मॉडेल इंग्लिश स्कूलमध्ये १४, १७ व १९ वर्षांखालील मुलींचा उत्स्फूर्त सहभाग; शिस्तबद्ध नियोजनातून स्पर्धांचे आयोजन
कल्याण : कल्याण-डोंबिवली महानगरपालिकेच्या क्रीडा व सांस्कृतिक विभागाच्या वतीने आयोजित जिल्हास्तरीय शालेय योगासन स्पर्धा २०२६-२७ या दिनांक २ नोव्हेंबर २०२६ रोजी मॉडेल इंग्लिश स्कूल येथे उत्साहपूर्ण आणि शांततामय वातावरणात पार पडल्या. या स्पर्धेत १४, १७ व १९ वर्षांखालील मुलींच्या विविध गटांचा समावेश होता. विद्यार्थिनींनी विविध योगासनांचे उत्कृष्ट सादरीकरण करून आपल्या कौशल्याचे प्रदर्शन केले.
विद्यार्थिनींकडून विविध योगासनांचे सादरीकरण
दिवसभर चाललेल्या या स्पर्धांमध्ये विद्यार्थिनींनी विविध योगासनांचे सादरीकरण केले. स्पर्धेचे परीक्षण करण्यासाठी पंच म्हणून श्री. राजेश पवार सर आणि त्यांच्या सहकाऱ्यांनी दिवसभर उपस्थित राहून विद्यार्थिनींच्या सादरीकरणाचे मूल्यमापन केले व गुणदानाची जबाबदारी पार पाडली. कल्याण-डोंबिवली महानगरपालिकेचे क्रीडा विभागाचे डीएसओ पर्यवेक्षक श्री. कांबळे सर यांचीही यावेळी उपस्थिती होती.
मॉडेल इंग्लिश स्कूलकडून शिस्तबद्ध आयोजन
या स्पर्धेचे आयोजन मॉडेल इंग्लिश स्कूलचे सुनील पाटील सर आणि मेघा परब मॅडम यांनी अत्यंत नियोजनबद्ध पद्धतीने केले. शांततापूर्ण आणि शिस्तबद्ध वातावरणात स्पर्धा पार पाडण्यासाठी आयोजकांनी विशेष दक्षता घेतली. गेल्या अनेक वर्षांपासून मॉडेल इंग्लिश स्कूलच्या माध्यमातून जिल्हास्तरीय योगासन स्पर्धांचे आयोजन केले जात आहे.
यावेळी सुनील पाटील सर यांनी कल्याण-डोंबिवली महानगरपालिकेने स्पर्धेच्या आयोजनाची जबाबदारी विश्वासाने सोपविल्याबद्दल प्रशासनाचे आभार व्यक्त केले. तसेच स्पर्धेच्या यशस्वी आयोजनासाठी शाळेचे मुख्याध्यापक, प्राचार्य आणि व्यवस्थापन यांचे मोलाचे सहकार्य लाभल्याचे सांगत त्यांनी त्यांचेही आभार मानले.
