कल्याण : विद्यार्थ्यांमध्ये क्रीडाभावना, शारीरिक तंदुरुस्ती, आत्मविश्वास आणि निरोगी जीवनशैलीची जाणीव निर्माण करण्याच्या उद्देशाने त्रिदल एज्युकेशन सोसायटीच्या वतीने त्रिदल आंतरशालेय वर्षा मॅरेथॉन स्पर्धेचे आयोजन करण्यात आले आहे. ही स्पर्धा उद्या, शनिवार दि. ८ ऑगस्ट २०२६ रोजी सकाळी ठीक ८ वाजता मोहने येथील पाटील बाल मंदिर व ज्युनिअर कॉलेज येथे होणार आहे. स्पर्धेचे उद्घाटन कल्याण-डोंबिवली महानगरपालिकेच्या महापौर अॅड. हर्षाली ताई चौधरी यांच्या शुभहस्ते होणार आहे.
सुमारे ६०० विद्यार्थ्यांचा सहभाग
या मॅरेथॉनमध्ये सुमारे ६०० विद्यार्थी सहभागी होणार असून,त्रिदल शाळा समूहासह सिंगडील स्कूल, गाळेगाव आणि प्रबोधनकार ठाकरे इंग्लिश स्कूल, नेतेवली, कल्याण पूर्व या शाळांचाही सहभाग असणार आहे. विविध शाळांमधील विद्यार्थ्यांना एकत्र आणून त्यांच्यात क्रीडा कौशल्य, शिस्त, चिकाटी आणि संघभावना विकसित करण्याचा या स्पर्धेचा उद्देश आहे.
पावसातही क्रीडाभावनेला प्रोत्साहन
पावसाळ्याच्या पार्श्वभूमीवर आयोजित करण्यात आलेल्या या वर्षा मॅरेथॉनमधून विद्यार्थ्यांना प्रतिकूल परिस्थितीतही उत्साहाने आणि जिद्दीने सहभागी होण्याची संधी मिळणार आहे. मैदानी खेळांमुळे विद्यार्थ्यांचे शारीरिक तसेच मानसिक आरोग्य सक्षम होण्यास मदत होते. त्यामुळे शिक्षणासोबतच क्रीडा क्षेत्रालाही महत्त्व देण्याचा हा उपक्रम असल्याचे आयोजकांकडून सांगण्यात आले.
१० ऑगस्ट रोजी आनंद ग्लोबल स्कूलमध्ये स्पर्धा
त्रिदल आंतरशालेय वर्षा मॅरेथॉन स्पर्धेचा पुढील टप्पा सोमवार दि. १० ऑगस्ट २०२६ रोजी आनंद ग्लोबल स्कूल, कल्याण येथे आयोजित करण्यात आला आहे. या स्पर्धेलाही विद्यार्थ्यांचा मोठा सहभाग अपेक्षित आहे.
मान्यवरांची उपस्थिती या कार्यक्रमास स्थानिक
नगरसेवक, संस्थेचे संस्थापक व पदाधिकारी, प्रतिष्ठित नागरिक तसेच त्रिदल शाळा समूहाचे मुख्याध्यापक उपस्थित राहणार आहेत. मान्यवरांच्या उपस्थितीत विद्यार्थ्यांना प्रोत्साहन मिळणार असून, स्पर्धेच्या माध्यमातून त्यांच्या क्रीडा गुणांना व्यासपीठ उपलब्ध होणार आहे.
सर्वांगीण विकासासाठी क्रीडा आवश्यक
विद्यार्थ्यांचा विकास केवळ शैक्षणिक गुणवत्तेपुरता मर्यादित न राहता त्यांच्यात शारीरिक क्षमता, मानसिक स्वास्थ्य, नेतृत्वगुण आणि क्रीडाभावना विकसित होणे आवश्यक आहे. याच उद्देशाने आयोजित करण्यात आलेली ही वर्षा मॅरेथॉन विद्यार्थ्यांच्या सर्वांगीण विकासाला चालना देणारी ठरणार आहे.
“विद्यार्थ्यांच्या सर्वांगीण विकासासाठी शिक्षणासोबतच क्रीडा आणि शारीरिक तंदुरुस्तीला आम्ही नेहमीच प्राधान्य देत आलो आहोत. विद्यार्थ्यांमध्ये क्रीडाभावना, आत्मविश्वास, शिस्त आणि जिद्द निर्माण व्हावी, या उद्देशाने त्रिदल आंतरशालेय वर्षा मॅरेथॉनचे आयोजन करण्यात आले आहे. यंदाच्या स्पर्धेत सुमारे ६०० विद्यार्थी सहभागी होणार असून विविध शाळांचा उत्स्फूर्त सहभाग लाभत आहे. पावसाळ्यातही विद्यार्थ्यांनी मोठ्या उत्साहाने सहभागी व्हावे आणि या स्पर्धेचा आनंद घेत निरोगी जीवनशैलीचा संदेश घ्यावा, हीच आमची अपेक्षा आहे.”
– भगवान पाटील, प्रिन्सिपल तथा डायरेक्टर त्रिदल एज्युकेशन सोसायटी
